PREMIOS NOVO CIRCO GALEGO
MANU LAGO 2025
Dende hai anos existía a necesidade de realizar un evento que convocase ao sector do Novo Circo Galego, que servise para recoñecer o esforzo das súas profesionais e que funcionase como escaparate para promocionar a calidade das súas propostas.
O ano pasado, a APCG veu cubrir ese valeiro creando a primeira edición dos Premios Manu Lago, uns galardóns específicos para o Novo Circo Galego, que este ano lanzan a súa segunda edición.
MANUEL LAGO
Os Premios de Novo Circo Galego Manu Lago honran a memoria do pallaso e malabarista Manuel Lago García, un dos artistas que máis fixo pola consolidación do Novo Circo no noso país, tristemente falecido en 2017.
COLABORAN:
CATEGORÍAS
Nesta segunda edición de 2025 recoñeceranse as tres seguintes categorías:
-
Premio “Manu Lago” ao Mellor Espectáculo de Rúa:
Outorgado ao mellor espectáculo de novo circo de rúa. -
Premio “Manu Lago” ao Mellor Espectáculo de Sala:
Outorgado ao mellor espectáculo de novo circo de sala. -
Premio “Manu Lago” de Recoñecemento ao Novo Circo Galego:
Outorgado a algunha artista, compañía, entidade ou persoa para recoñecer a súa labor na visibilización, promoción e difusión do NCG.
GALARDÓNS
Cada unha das tres categorías será premiada cunha estatuíña que lembre a figura do artista de circo Manuel Lago, realizada polo artista plástico Jose Perozo. Todas as finalistas recibirán un diploma acreditativo asinado pola directiva da APCG.
CONVOCATORIA
A convocatoria para a presentación de solicitudes para optar aos Premios de Rúa e de Sala estará aberta a todas as artistas e compañías de circo galegas ou afincadas en Galicia que queiran presentar as súas candidaturas.
Publicaranse as bases, os procedementos e o formulario para realizar o rexistro de candidaturas na páxina web da APCG, e realizarase unha ampla difusión desta convocatoria vía redes sociais e mailing para que chegue ao maior número de interesadas posible.
Inscribe aqui o teu espectáculo
Para o Premio de Recoñecemento, farase unha consulta ás socias da APCG, e despois serán debatidas as opcións entre a Comisión de Premios e a directiva da APCG para facer unha lista de candidaturas finalistas.
ENTREGA
A entrega de premios realizarase nunha gala denominada Circo de Inverno, o 30 de novembro de 2025, no Salón Teatro de Santiago de Compostela.
Será un evento no que se contratará un equipo de dirección artística e de produción, así como un elenco de artistas, para realizar un espectáculo creado especificamente para a ocasión, no que se fará entrega dos devanditos premios.